Ahotsaren kontrol zehatza, ahoskera argia, musikaltasun adimentsua eta kantatzen duen guztiarekin bihotzera iristeko trebetasunak tenore liriko garrantzitsuenen arteko lekua bermatzen dio Christoph Prégardieni. Aldizka mundu osoko orkestrekin jotzen du, besteak beste, Vienako eta Berlingo Orkestra Filarmonikoekin, Bavariako Irratiko Orkestra Sinfonikoarekin, Amsterdamgo Concertgebouw Orkestrarekin, Dresdeko Staatskapellerekin edo Leipzigeko Gewandhausorchesterrekin. Bere orkestra errepertorio zabalean, oratorio barroko, klasiko eta erromantiko handiak daude, baita XVII. mendeko (Monteverdi, Purcell, Schütz) eta XX. mendeko (Britten, Killmayer, Rihm, Stravinsky) obrak ere. Irakaskuntza da tenorearen bizitza musikalaren zati garrantzitsu bat; 2004tik Koloniako Hochschule für Musik und Tanz-eko irakaslea da eta, gainera, mundu osoko abeslari gazteei masterclasseak ere ematen dizkie aldizka.

Julius Drake Londresen bizi da. Bere alorreko instrumentistarik onenetakoa bezala lortu du nazioarteko ospea, eta munduko artista nagusi askorekin elkarlanean aritzen da. The New Yorkerrek "piano-jotzaile paregabe" gisa deskribatu du. Aldizka, auditorioetan eta musika jaialdi nagusietan agertzen da. Abestiarekiko duen zaletasun sutsua dela eta kantu multzoak diseinatzeko gonbidatu dute Londresko Wigmore Hall, BBC eta Amsterdameko Royal Concertgebouw jaialdietarako. Londresko Middle Temple Hall historikoan, bere urteroko kantaldi sortan – Julius Drake and Friends-en – errezitaldiak aurkeztu ditu Thomas Allen, Olaf Bär, Ian Bostridge, Angelika Kirchschlager, Iestyn Davies, Veronique Gens, Felicity Lott, Simon Keenlyside, Christopher Maltman edo Christoph Prégardien bezalako abeslari nabarmenekin.